የአዲስ አበባ የመሬት ሊዝ ዋጋ ንረት በድጋሚ አገረሸ


-በካሬ ሜትር 65 ሺሕ ብር ቀረበ

addis abeba

ይረጋጋል ተብሎ ሲጠበቅ የነበረው የአዲስ አበባ ከተማ የመሬት ሊዝ ዋጋ ከምንጊዜውም በላይ ንረት አሳየ፡፡ ስምንተኛው የሊዝ ጨረታ ባለፈው ሳምንት ሲከፈት፣ ቦሌ ክፍለ ከተማ ኤድና ሞል አካባቢ ለሚገኝ መሬት በከተማው ታሪክ ትልቅ የተባለ የመጫረቻ ዋጋ ቀርቧል፡፡

ከኤድና ሞል ዝቅ ብሎ ወደ ደሳለኝ ሆቴል በሚወስደው መንገድ ላይ ለሚገኝ 158 ካሬ ሜትር ቦታ፣ ኤስኤንአይ ትሬዲንግ ኩባንያ በካሬ ሜትር 65 ሺሕ ብር አቅርቧል፡፡ ይህንን ቦታ ለመግዛት 59 ተጫራቾች ሲቀርቡ፣ ጨረታው በይፋ በተከፈተበት ዕለት የተገኙ ሰዎችን ያስገረመው፣ ይህንኑ ቦታ ለመግዛት በሁለተኛ ደረጃ የቀረበው ኤኤንኤ ኮንስትራክሽን ኩባንያ በአንድ ካሬ ሜትር 64 ሺሕ ብር ማቅረቡ ነው፡፡

ቦታው ለቅይጥ አገልግሎት የሚውል ሲሆን፣ ከፍተኛ ገንዘብና በርካታ ተጫራቾች የቀረቡለት ብቸኛ ታሪከኛ ቦታ ነው ሲሉ ለጉዳዩ ቅርበት ያላቸው ተናግረዋል፡፡

የአዲስ አበባ ከተማ አስተዳደር በስምንተኛው ዙር ሊዝ ጨረታ 282 ቦታዎችን ለጨረታ አቅርቧል፡፡ ቦሌ ክፍለ ከተማ ውስጥ 220 ቦታዎች፣ ንፋስ ስልክ ላፍቶ ክፍለ ከተማ 20 ቦታዎች፣ ኮልፌ ቀራኒዮ 32 ቦታዎች ለጨረታ ከቀረቡት ውስጥ ይገኛሉ፡፡

ቦሌ ክፍለ ከተማ ኤድና ሞል አካባቢ ሁለት ቦታዎች ለጨረታ ቢቀርቡም፣ አንደኛው ቦታ በተለያዩ ምክንያቶች ሲሰረዝ ጨረታው የተከፈተው ለአንድ ቦታ ብቻ ነው፡፡ ለዚህም ቦታ በርካታ ተጫራቾች ከመቅረባቸውም ባሻገር እስከዛሬ ሪከርድ ሆኖ የተመዘገበውን ዋጋ በእጥፍ በልጦ ተገኝቷል፡፡

ባለፈው ታኅሳስ ወር ተከፍቶ በነበረው ሊዝ ጨረታ በቂርቆስ ክፍለ ከተማ ወረዳ ሁለት ወሎ ሠፈር አካባቢ ለሚገኝ ቦታ በካሬ ሜትር 32 ሺሕ ብር መቅረቡ ይታወሳል፡፡ ሞም ፕሮፐርቲ ዴቨሎፕመንት ኩባንያ በወቅቱ በካሬ ሜትር 32 ሺሕ ብር ማቅረቡ መነጋገርያ እንደነበር አይዘነጋም፡፡

በወቅቱ መታዘብ እንደታቸለው ለአብዛኛዎቹ ቦታዎች የተወዳደሩ ተጫራቾች ያቀረቡት የመጫረቻ ዋጋ እጅግ የተራራቀ ነበር፡፡ በአንድ አካባቢ ለጨረታ ከቀረቡ ጐረቤታማ ቦታዎች አንዳንዶቹ በካሬ ሜትር አራት ሺሕ ብር ሲያቀርቡ፣ የተቀሩት ደግሞ እስከ 18 ሺሕ ብር እንከፍላለን ብለዋል፡፡

ይህ ያልተጠና የግብይት አካሄድ የከተማውን የመሬት ዋጋ መተንበይ በማያስችል ደረጃ ግራ የሚያጋባ እያደረገው ነው ይላሉ ለጉዳዩ ቅርበት ያላቸው የመሬት ባለሙያዎች፡፡ በስምንተኛው ጨረታ ዝቅተኛ ገንዘብ አቅርቦ አሸናፊ የሆነው ‹‹ፒያሳ መሐሙድ ጋ ጠብቂኝ›› በሚለው መጽሐፉ የሚታወቀው አቶ መሐመድ ሰልማን ነው፡፡ አቶ መሐመድ ቦሌ ቡልቡላ አካባቢ ለቅይጥ አገልግሎት የሚውል 645 ካሬ ሜትር ቦታ በአንድ ካሬ ሜትር 1,389 ብር አቅርቧል፡፡ በዚህ ዋጋ ማሸነፍ አዲስ አበባ ላይ እየቀረ በመምጣቱ ጨረታው ሲከፈት የነበሩ ታዳሚዎች አድናቆታቸውን በጭብጨባ ገልጸዋል፡፡

የአዲስ አበባ ከተማ አስተዳደር በመሬት ግብይት ላይ ያለውን የዋጋ ንረት ለማስቀረት መሬት በየወሩ በሰፊው በማቅረብ ላይ ይገኛል፡፡

በሚቀጥለው ሳምንትም በርካታ የሊዝ ቦታዎችን ለማቅረብ እየተዘጋጀ ነው የሚሉ አንድ የከተማው ባለሥልጣን፣ የዋጋ ንረቱ ለምን ሳያቋርጥ እንደሚያሻቅብ ግራ እንደሚገባቸው ተናግረዋል፡፡ ነገር ግን ከዚህ በተቃራኒው አስተያየታቸውን የሚሰጡ ባለሙያዎች ደግሞ፣ አሁንም በገበያው ውስጥ ያለው ፍላጐትና አቅርቦት ባለመጣጣሙ ምክንያት አስተዳደሩ በሰፊው መሬት ማቅረብ እንደሚኖርበት አሳስበዋል፡፡

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s