Archive | January 2018

ሰላም ባስና ዳሽን ቢራ ከፍተኛ ጉዳት ደረሰባቸው

(ኢሳት ) በኢትዮጵያ የተከሰተውን ሕዝባዊ ተቃውሞ ተከትሎ በተጠራ አድማና ጥቃት ከፍተኛ ጉዳት እንደደረሰባቸው ሰላም ባስና ዳሽን ቢራ አስታወቁ።

የቢቢሲ የአማርኛው አገልግሎት ያነጋገራቸው የሁለቱ ድርጅቶች ሃላፊዎች እንዳሉት በአድማውና በጥቃቱ ምክንያት ከኪሳራ ባሻገር ህዝቡ በአገልግሎታችን እንዳይጠቀም ከፍተኛ ተጽእኖ ፈጥሯል።

ሰላም ባስ በአራት መስመሮች አገልግሎት ማቋረጡን ሲያሳውቅ ዳሽን ቢራ በተለይ በባህርዳር ከፍተኛ የተቀባይነት ቀውስ እንደገጠመው ገልጿል።

ለቢቢሲ አማርኛ ቃለ መጠይቅ የሰጡት የሰላም ባስ አገልግሎት ማህበር ስራ አስኪያጅ አቶ ሀጎስ አባይ ባለፉት ሁለት ዓመታት በተፈጠረው ችግር ምክንያት ህዝቡ በሰላም ባስ ለመጠቀም ፍራቻ አድሮበታል።

በዚህም ምክንያት የገቢ መቀነስ ታይቷል ሲሉ ገልጸዋል።

በቅርቡ ወደቁልቢ ገብርዔል በመጓዝ ላይ በነበሩ አራት የሰላም ባስ አውቶብሶች ላይ ጥቃት ተሰንዝሮ መስታወቶቻቸው መሰባበሩን አቶ ሀጎስ አስታውሰዋል።

ሁለት የሰላም ባሶች በተለያዩ የሀገሪቱ አከባቢዎች መቃጠላቸውንም ስራ አስኪያጁ ጠቅሰዋል።

ሰላም ባስ በመላ ሀገሪቱ በ17 መስመሮች አገልግሎት እንደሚሰጥ የተናገሩት አቶ ሀጎስ በተፈጠረው የተቃውሞ እንቅስቃሴ ምክንያት የአራቱ መስመሮች አገልግሎት መቋረጡን ገልጸዋል።

በዚህም መሰረት በሀረር፣ ድሬዳዋ፣ ጂጂጋና አሶሳ መስመሮች ሲሰጥ የነበረው አገልግሎት ካለፉት ሶስት ወራት ወዲህ መቋረጡን ለማወቅ ተችሏል።

በሌሎች የሀገሪቱ አካባቢዎች ችግር አልገጠመንም ብለው መናገር ያልደፈሩት አቶ ሀጎስ አባይ ከፍተኛ ተጽዕኖ አልደረሰብንም በሚል አልፈውታል።

በጎንደር ህዝባዊ ተቃውሞ በተቀሰቀሰ ጊዜ በርካታ የሰላም ባስ አውቶብሶች ጥቃት የተሰነዘረባቸው መሆኑ ይታወሳል።

በቅርቡም በወሎ ኡርጌሳና በሰሜን ሸዋ አጣዬ መስመር ተመሳሳይ ጥቃትና እገታ በሰላም ባስ ላይ መደረጉን መዘገባችን የሚታወስ ነው።

ስራ አስኪያጁ አቶ ሀጎስ አባይ በገቢ ደረጃም ጉዳት እንደደረሰባቸው ገልጸዋል።

ከባለፈው ዓመት ጋር ሲነጻጻር በዘንድሮ ገቢያችን መቀነሱን አውቀናል ብለዋል።

ሰላም ባስ ከኢትዮጵያ ህዝብ በተዘረፈ ገንዘብ የተቋቋመው የትግራይ መልሶ ማቋቋሚያ ድርጅት ኢፈርት ንብረት በመሆኑ በመላ ሀገሪቱ አድማ እንደተጠራበት ይነገራል።

አቶ ሀጎስ ግን ያስተባብላሉ። በአክሲዮን የሚተዳደር ድርጅት ነው በማለት።

በሌላ በኩል በባህርዳር ከተማ በአንድ ቀን ከ60 በላይ ዜጎች በአጋዚ ሰራዊት መገደላቸውን ተከትሎ አድማ የተጠራበት ዳሽን ቢራም ተመሳሳይ ቀውስ እንደገጠመው እየተነገረ ነው።

የፋብሪካው ምክትል ስራአስኪያጅ አቶ ሙሉጌታ ማሩ ለቢቢሲ አማርኛ እንደተናገሩት ዳሽን ቢራ በተለይ በባህርዳር ከፍተኛ ተጽዕኖ ተፈጥሮበታል።

ኪሳራ ባይገጥመንም ከባለፉት ዓመታት ጋር ሲነጻጸር ትርፋችን ቀንሷል ብለዋል አቶ ሙሉጌታ።

ለጥይት መግዣ ገንዘብ አንሰጥም በሚል አገልግሎታችን ላይ አድማ መመታቱ ተገቢ አይደለም ያሉት አቶ ሙሉጌታ እንደሌሎች ድርጅቶች ለመንግስት የምንክፍለው ግብር ብቻ ነው ሲሉም አስተባብለዋል።

በአማራ ክልል ዳሽን ቢራ የሚያዘጋጃቸው የሙዚቃ ዝግጅቶች በተደጋጋሚ አድማ ተመቶባቸው የተቋረጡ መሆኑን መዘገባችን ይታወሳል።

ቢቢሲ አማርኛ ያነጋገራቸው አንድ የባህርዳር ነዋሪ እንዳሉት በባህርዳር ዳሽን ቢራ መጠጣት አደጋ አለው።

Advertisements

አቶ አባዱላና አቶ በረከት

 

Abadula and Bereket, rescinded their resignation from government.

አቶ አባዱላና አቶ በረከት መልቀቂያቸውን ስበዋል። ወደነበሩበት ተመልሰዋል። የህወሀት ልሳን ሬዲዮ ፋና ትላንት ይሄን ነገረን። የዛሬ ሳምንት ሌላው አፍቃሪ ህወሀት ‘ሪፖርተር’ ጋዜጣ የአቶ አባዱላ መልቀቂያ ተቀባይነት አገኘ ሲል በፊት ገጹ አውጥቶ ነበር። ያኔ ‘ወንድ ልጅ ቆረጠ’ ብለን የአባዱላን ውሳኔ ታዝበን ነበር። ከወራት በፊት አቶ ሃይለማርያም በምክር ቤት ተገኝቶ የአቶ በረከትን መልቀቂያ በተመለከተ ‘በረከት ደክሞታል። እስቲ ይረፍ። ጥያቄውን ተቀብለናል’ ብሎን ነበር።

ሁለቱ ሚዲያዎች ሪፖርተርና ፋና ለህወሀት የስስት ልጆች ናቸው። ቤተኛ ናቸው። አንዱ የስለት ልጅ በሚል ካልተበላለጡ በቀር ከህወሀት አንጻር የሚለያቸው ምንም ነገር የለም። ከፈረሱ አፍ ወሬውን እንደሚያቀብሉ አይጠረጠርም። በአንድ ሳምንት ልዩነት ሁለት ፍጹም ተቃራኒ ወሬዎችን ሲነገሩን ግን የህወሀትን የጤንነት መቃወስ ምን ደረጃ ላይ እንደደረሰ ጥሩ ምልክት እንዲሆነን አድርጓል። በሀወሀት ውስጥ የሃይል መሳሳብ እንዳለ፡ ፍትጊያው እንዳልተቋጨ የሚያረጋግጥም ነው። አንዳንዶች ሆን ብሎ ህዝቡን ለማደናገር፡ የፖለቲካ ቁማር ለመጫወት ነው ብለው የህወሀትን የሴራ ፖለቲካ ከኋላ ተንደርድረው በመነሳት ይተነትናሉ። ህወሀት አሁን ካለበት ጽኑ ህመም አንጻር እንዲህ ዓይነት ጨዋታ አቅሙ ይፈቅድለት ይሆን?

ሃይለማርያም በእርግጥ እንደነገሩት ነው። ደብረጺዮን ደውሎ እንዲህ በል ካለው ከረባቱን ገጭ አድርጎ ማይክ ይዞ ይለዋል። በረከት ጠርቶት እንደዚያ በል ካለው ደግሞ ሌላ ይላል። የነገሩትን ነው። ሀገሪቱ ውስጥ ምን እየተደረገ እንደሆነ የሚያውቅ አይመስለኝም። አንዳንድ ጊዜ ከህዝብ እኩል በቴሌቪዥን የሚሰማ ነው ቢባል ማጋነን አይሆንም። እናም የሃይለማርያምን እንተወው። ከሁለቱ የህወሀት አፈቀላጤዎች ግን የማንን እንመን?

አቶ አባዱላ ”የህዝቤ ክብር ሲነካ ማየት አልቻልኩም” ብሎ በቴሌቪዥን መስኮት ብቅ ያለ ዕለት ያልጠበቁት ሲገረሙ፡ ያልጣማቸው ሲያጣጥሉ፡ ህወሀቶች ደግሞ ሲራገሙ ነበር። አባዱላ በተለይ በጨፌ ኦሮሚያ አዳራሽ የብአዴን ልደት ሲከበር የተናገረው ‘ሰውዬው እውነትም ቆርጧል’ የሚል ስሜት በብዙዎች ዘንድ ፈጥሯል። ወደ ‘ሰውነት ተራ’ ለመመለስ የምሩን ወስኗል በለው የተቀበሉ ጥቂቶች አይደሉም። ባለፈው ሳምንት የኦሮሚያ ልዩ መብት በአዲስ አበባ የሚለው የፓርላማ የህዝብ ውይይት የተበተነ ጊዜ የያዘው አቋም ደግሞ ‘በሽታው ተመለሰበት እንዴ? ሳያገረሽበት አይቀርም’ የሚል አስተያየት እንዲሰጥበት አድርጓል።

አባዱላ መልቀቂያ ካቀረበበት ቀን ጀምሮ የህወሀት የሚዲያና የፌስ ቡክ ሰራዊት የስድብ ናዳውን ማዝነቡን አላቋረጠም። ከሀገር ቤት እስከባህር ማዶ የተጋሩ ማህበራት በሰልፍ አባዱላ ላይ የእርግማን መዓት፡ የውግዘት ጎርፍ ፡ ሲያወርዱ ከርመዋል። ”ምርኮኛውን ወታደር ሰው ባደረግን” ፡ ”ከአፈር አንስተን ስልጣን በሰጠን” እንዴት ተደፈርን ያለው የህወሀት መንደር ‘አባዱላ ይሰቀል’ ብሎ መግለጫ እስከማውጣት ደርሷል። ”የህዝቤ ክብር ተነካ” የሚለው የአባዱላ መግለጫ የተጋሩን ሰፈር በንዴት ማጬሱ እርግጥ ነው። ሁሌም ”የበላይነት” ከአምላክ የተሰጣቸው ክብር፡ ከሰማይ የተቸራቸው ጸጋ፡ የትኛውም ምድራዊ ሰው መግፈፍ የማይችለው ሞገስ አድርገው የሚቆጥሩት የተጋሩ ሰፈር ልጆች በአባዱላ መግለጫ መንጨርጨራቸው የሚጠበቅ ነበር። የአባዱላ ”የህዝቤ ክብር ተነካ” መግለጫ በተጋሩዎች መዝገበ ቃላት ‘ለህወሀት ውርደት’ የሚል ፍቺ አለው። ይህ የተጋሩዎች ጩሀት አባዱላ ላይ ጫና መፍጠሩ አልቀረም።

የህወሀት መሪዎች ከተጋሩ መንደር የሚስተጋባውን ‘አባዱላ ይሰቀል’ እሪታ በዝምታ የሚያልፉት አልነበረም። በዚህም በዚያም ብለው፡ እጅ ጠምዝዘው የአባዱላን ውሳኔ ሊያስቀይሩ የመቻላቸው ዕድል ሰፊ ነው። የአባዱላ አቋም ምን እንደሆነ አሁንም አልሰማንም። ውለታቸው ተሰምቶት፡ የውስኪ ብርጭቆ ሲያጋጭ ለዘመናት ከቆያቸው ህወሀቶች ጋር መፋታት ከብዶት፡ ውሳኔውን ሊቀለብስ ይችላል። ”ከኦነግ በላይ ለኦሮሞ ህዝብ የሚቀርበው ህወሀት ነው” ከሚለው ጥግ የደረሰ አቋሙ በብርሃን ፍጥነት ወደ ”የህወሀት የበላይነት አለ። የህዝቤ ክብር ተነካ” ውሳኔ የተለወጠው አባዱላ በዚያው ፍጥነት ”መንገድም ብርሃንም ህወሀት ነው” ቢል ሊደንቀን አይገባም። የህወሀቶች ነርቭ እስኪነካ ያንቀጠቀጣቸውን መግልጫ አባዱላ የሰጠው በህዝብ ማዕበል፡ በቄሮዎች አመጽ ግፊት መሆኑን መዘንጋት የለብንም። ህዝባዊ ንቅናቄው አሁን ካለበት ደረጃ ይበልጥ ከተፋፋመ አባዱላ ብቻ ሳይሆን ህሊናውን ሆዱ ስር የወሸቀ የህወሀት ተላላኪ በሙሉ ተጠራርጎ ሰልፉን ማሳመሩ የማይቀር ነው።

እንግዲህ ማንን እንመን? ሪፖርተርን ወይስ ሬዲዮ ፋናን? ዛሬ የኢህአዴግ የስራ አስፈጻሚ ኮሚቴ ለሶስት ሳምንት ያደረገውን ዝግ ስብሰባ በተመለከተ መግለጫ ይሰጣል ተብሎ ይጠበቃል። የአባዱላና የበረከት ወደነበሩበት መመለስ በመግለጫው የሚነገረን ከሆነ ከሪፖርተርና ከሬዲዮ ፋና የስለት ልጅ የትኛው እንደሆነ እንለያለን። በእርግጥ ሪፖርተር ህወሀት አደጋ ላይ ሲወድቅ ሰልፉን አስተካክሎ የውሸት መረጃዎች እየለቀቀ ህዝቡን በማደናገር፡ ህወሀትን ለማዳን ምሽግ የሚገባ እንደሆነ በተደጋጋሚ አስመስክሯል። አቶ መለስ የሞተ ጊዜ አስክሬን ከቤት አስቀምጦ ‘መለስ ለእረፍት አሜሪካን መሄዳቸው ታወቀ’ የሚል ዜና በፊት ገጹ ማውጣቱን እናስታውሳለን። ሬዲዮ ፋና የህወሀት ልሳን በመሆኑ እያደረገ ካለው የተለየ ነገር አይጠበቅበትም።

አሁንም ቢሆን መጨረሻውን ማየቱ የተሻለ ነው። ተስማማን አሉ እንጂ ስለመስማማታቸው የሚያረጋግጥ ነገር የለም። ስርዓቱ የሚገኝበት የቀውስ ቁመና በየሰዓቱ በሚዋዥቅ አቋም ከወዲህ ወዲያ ሲወዛወዝ እያየነው ነው። ህወሀት ክፉኛ ቆስሏል። ከዚህ በኋላ ቆሞ ለመራመድ የሚያስችል ስነልቦናም ሆነ አካላዊ ብቃት የለውም። እንደውም የአባዱላና የበረከት የመመለስ ውሳኔ እውነት ከሆነ የሚነግረን ህወሀት የመቃብር ጉዞው ከጠበቅነው በላይ እየፈጠነ መምጣቱን ነው። ሁለቱም ነባር የኢህአዴግ አመራሮች ህወሀትን እንዲታደጉት ተፈልጓል። ተረባርበው፡ በድርጅት ውስጥ ያላቸውን መዋቅራዊ ተቀባይነት ተጠቅመው ህወሀትን ከመቃብር አፋፍ እንዲመልሱት ነው። ከዚህ ያለፈ ሌላ ሚስጢር የለውም። ሰው ጨው አይደለም። አይቀመስም። አባዱላ ምን እንደሚያስብ አናውቅም። ህወሀትን ማዳን ወይስ የኦሮሞ ህዝብን የነጻነት ጥያቄ መደገፍ? ለአባዱላ የቀረቡ ሁለት ምርጫዎች ናቸው። ስለበረከት ብዙም ማለት አያስፈልግም። በረከት ምርጫ የለውም። ከህወሀት ጋር አብሮ አፈር ከመልበስ ውጪ ምን ዕድል አለው?

በኢትዮጵያ የሚጠበቀው ለውጥ ከኢህአዴግ መንደር የሚመጣ ነው ብሎ የሚያምን ጅል የለም። የዝሆኖች ጥል ሞታቸውን ያፋጥናል ከሚል በቅርበት ተከታተልነው እንጂ የእነሱ መንገድ ወደ ነጻነት ይወስደናል ብሎ የጠበቀ ካለ በቶሎ የአእምሮ ህክምና መውሰድ ያለበት ሰው ነው። እነለማ/ገዱ የጀመሩትን እንቅስቃሴ በአወንታዊ ጎኑ የተቀበልነው የህወሀትን ሞት ስለሚያፋጥነው ነው። ከዚያ ያለፈ ምክንያት የለውም። እነሱም ወደዚህ ተስበው የገቡት በህዝቡ የለውጥ እንቅስቃሴ ነው። ህወሀት በባህሪው ውስጣዊ ሽኩቻ ስጋውን ይጨርሰዋል። ነፍሱ ሲጥ እስክትል ይደርሳል።

በኢትዮጵያ የምናንፍቀው ለውጥ ብዙ መስዋዕትነት እንዳያስከፍል ከተፈለገም አገዛዙ መንደር የፈነዳውን ፍጥጫ ወደለየለት ጦርነት እንዲቀየርና እርስ በእርስ ተበላልተው እንዲያልቁ በማድረግ መሆኑ ይታመናል። እነለማ/ገዱ ያን መንገድ ሲጀምሩት ህወሀትም ወደ መቃብሩ የጀመረው ጉዞ በእጥፍ ፍጥነት ቀጥሎ ነበር። ያን ፍጥነቱን ለመቀነስ እየተረባረበ ነው። እነአባዱላን እንዲመለሱ የሚያደርገውም ወደዘላለማዊ ጉድጓዱ መቃረቡ ብርክ ስላዚያዘው መሆኑን መገመት አይከብድም። ግን ደግሞ አይቀርለትም። የተቀጣጠለው የህዝብ እምቢተኝነት የህወሀትን ሞት በቅርቡ ዕውን ማድረጉን ቅንጣት ታህል መጠራጠር አይገባም።

አባዱላ የማያድነው፡ የበረከት መመለስ የማይፈውሰው፡ የእነለማ/ገዱ መለሳለስ የማይሽረው፡ የተጋሩዎች እሪታና ኋይታ የማያስታግሰው ጽኑ ህመም ህወሀትን እያሰቃየው ነው። ከዳር እስከዳር የተቀጣጠለው የህዝቡ የለውጥ ትግል ህወሀትን ገድሎ አፈር ሳያለብስ አይመለስም። ህዝብ ወስኗል። ቆርጧል። ህወሀትን ከነጉድፉ፡ ከነግሳንግሱና ግብስብሱ፡ ተጠራርጎ ከሚወገድበት ስርነቀል ለውጥ ላይ ያደረሰው ህዝባዊው ትግል ወደኋላ የሚመለስ አይደለም።